အခုလည်း အဆိုတော် R ဇာနည် တယောက် ပြုံးပြုံးကြီးများ ကြည့်နေဦးမှာလား
R ကြီးလို ရယ်တတ်ချင်လိုက်တာ။ (၆-၉-၂၀၂၀) ညကလွှင့်တဲ့ သယ်ဗွိုက်စ် Blind Audition မှာ ပြိုင်ပွဲဝင်တယောက်က (ညှို့တတ်သောပင်လယ် ဆွဲငင်သော
လမင်း)သီချင်းနဲ့ လာပြိုင်သွားတယ်။ ဒွေး ရုပ်ရှင်ကားမှာ အဲဒီသီချင်းကိုပဲ R ဇာနည် နဲ့ မီးမီးခဲ ဆိုတဲ့အခါ အတော်လေး ပေါက်ခဲ့ပါတယ်။အိပ်မက်ဆုံရာမှာ အဲဒီသီချင်းကိုပဲ အောင်ထက်က ပြန်ဆိုခဲ့ဖူးပြီး အားပေးမှုရလို့ ခဏခဏ ပြန်ဆိုခဲ့တယ်။
ပြိုင်ပွဲဝင်က သီချင်းဆိုပြီးတာနဲ့နီနီခင်ဇော်က ဒွန့်ဒွန့်လူးပြီး (အဲဒါ အောင်ထက်သီချင်း) လို့ ထအော်တော့တာပဲ။ ပြိုင်ပွဲဝင်က (ကျွန်တော် အောင်ထက်ရဲ့ပရိသတ်ပါ) လို့ အရင်
ပြောပြီး ( ဒါပေမယ့် ဒါပေမယ့်) နဲ့ စကားလက်စကို မဆုံးရသေးဘူး (အောင်ထက်ကို ကြိုက်တယ် မဟုတ်လား အောင်ထက် ခရေဇီမို့လား) နဲ့ ဇွတ်တွေ စကားဖြတ်ပြောတော့ ပြိုင်ပွဲဝင်က R ဇာနည်ကို အားတုံ့အားနာဖြစ်နေပုံရတယ်။
သူ့ရဲ့ body language ကြည့်ရင် သိပါတယ်။ အဲဒါနဲ့တင် မပြီးသေးဘူး။ သူ့ဘာသူနေရှာတဲ့ အောင်ထက်ကို ချက်ချင်းဖုန်းဆက်ပြီး
(အကို အကို့သီချင်းနဲ့လာပြိုင်နေတယ်)ဆိုပြီး ဆပ်စလူးတွေ ထပြတော့ ဘေးမှာ ငုတ်တုပ်ကြီးထိုင် နေတဲ့ R ဇာနည်က အေးဆေးပဲ ပြုံးနေတယ်။
Coach ၃ ယောက်လုံး ဖုန်းထဲက(အောင်ထက် မင်းသီချင်း မင်းသီချင်း)နဲ့ အလုအယက်ကို ခရက်ဒစ် တွေပေးကြတော့ R ကြီးက တခွန်းပဲ ဝင်ပြောတယ်
(ညီလေး ကိုဇာနည်လဲပါတယ် နော်)တဲ့။Coach အဖြစ်ရွေးဖို့ သူ့ကို ထောက်ခံပေးပါဆိုတဲ့ သဘောပဲ ဝင်ပြောတယ်။
အမှန်တော့အောင်ထက်လည်း အဲဒီသီချင်းကို ပိုင်ပိုင်နိုင်နိုင် ဆိုထားတဲ့ အဆိုတော်အနေနဲ့ ခရက်ဒစ် ရသင့်ပါတယ်။ coach ၄ ယောက်ထဲမှာ R ဇာနည်မပါဘူးဆိုရင်တော့
အောင်ထက်ကိုပဲ အခုလို ဝိုင်းဂုဏ်ပြုနေတာက ပြဿနာမရှိဘူး။အခုတော့အဲဒီသီချင်းကိုပဲ အောင်ထက် လူမွှေး မပြောင်ခင်ဘဝကတည်းက လူသိများအောင် သီဆိုထားတဲ့
အဆိုတော်က ဘေးမှာငုတ်တုပ်ကြီး ထိုင်နေတာကိုတောင် နည်းနည်းလေးမှ အသိ အမှတ်မပြုတာကြီးက အတော်ရုပ်ပေါက်ပါတယ်။
အနည်းဆုံး(ဟုတ်တယ်နော် ဒီသီချင်းလေးကို ကိုဇာနည်လည်း ဆိုခဲ့ဖူးတယ် အောင်ထက်လည်း ဆိုထားတယ်)လို့ ပြောမိရင် မြေမျိုမှာစိုးလို့လား မသိဘူး။R ကြီး ဆိုထားမှန်း တကယ်မသိကြဘူး ဆိုရင်တော့ ပိုပြီးရုပ်ပေါက်သွားပါပြီ။
ပြိုင်ပွဲဝင်က သူ့အတွက် coach ကို ရွေးတဲ့အခါ သူ့ဘေးမှာ အောင်တထက်တည်း ထက်နေတဲ့ သုံးယောက်လုံးကို အရေးမလုပ်ဘဲ R ကြီးကိုပဲ ရွေးသွားတယ်။
ရွေးသွားတာတောင် R ကြီးရဲ့ သီချင်းလေးဆိုပြပြီးရွေးသွားတာ။နည်းနည်းမှ ဒွိဟဖြစ်မနေဘူး။သူ့စိတ်ထဲမှာ R ကြီးကိုရွေးဖို့ ရည်ရွယ်ဆုံးဖြတ်ပြီးသားဆိုတာ အသိသာကြီး။ အဲဒီလိုရွေးတော့ R ကြီးက ရယ်ပြန်ပါတယ်။
လက်တွေ့ဘဝမှာလည်း R ကြီးလို အဖြစ်မျိုး ကြုံဖူးကြလိမ့်မယ် ထင်တယ်။ကိုယ်ကတော့ တစုံတရာကို စွမ်းဆောင်ခဲ့တယ်၊ တခုခု လုပ် ပေးခဲ့တယ်၊ ပေးဆပ်ခဲ့တယ်၊
ဒါပေမယ့် ကိုယ့် ကို နည်းနည်းလေးမှ အသိအမှတ်မပြုဘူး။ သောက်ဖက်မလုပ်ဘူးပေါ့လေ။ကိုယ် လုပ်ခဲ့ တယ်ဆိုတာ မသိလို့လား၊ သိလျက်ကြီးနဲ့ကို
ဉပက္ခာပြုတာလား တခုခုပေါ့။ကိုယ် မဟုတ် တဲ့အခြားလူကိုမှ ဂုဏ်တွေ စွတ်ဖော်ပေးကြ၊ ချီးမွမ်းပြကြတာမျိုးတွေ ကြုံဖူးကြပါမယ်။
လုပ်ငန်းခွင်မှာရော၊ relationship တခုမှာရော၊ အသိုင်းအဝိုင်းတခုမှာရော R ကြီး အခု ကြုံရ သလိုမျိုး ကြုံဖူးကြမယ်။ အတော်ခံစားရခက် မယ့်အခြေအနေပဲ။
R ကြီးကတော့ အေးဆေး ပါပဲ။ (ဒီသီချင်း ငါလည်း ဆိုခဲ့ဖူးတယ်လေ)လို့ အရှက်မရှိ ထပြောမနေပါဘူး။ထိုင်ရာကမထပဲ သောက်တလွဲဖြစ်စဉ်တခုလုံးကို ပြုံးပြုံးလေးပဲ
ထိုင်ကြည့်နေတယ်။မချိပြုံး ပြုံးတာမဟုတ်ဘူး။ ပေါ့ပါ့ပါးပါးပဲ ပြုံးနေတာနော်။အသိအမှတ်မပြု ခံရလို့ ကျွဲမြီးတိုမနေဘဲ အဲလိုပြုံးပြီးကြည့်နေ လိုက်တာကမှ ပိုအရသာရှိမှာ သေချာတယ်။
ကိုယ် ဘာလုပ်ခဲ့တယ်၊ ကိုယ့်သမိုင်းက ဘာလဲစောက်ခွက်က အမြဲပြောင်နေတော့ စိတ်တိုပြလည်း ဘယ်သူမှ မကြောက်ကြတော့ဘူး ဆိုတာ လူတယောက်
(သို့မဟုတ်)လူနည်းစုက ဆုံးဖြတ်မပေးနိုင်ပါဘူး။ သူများပါးစပ်အဖျားမှာ လမ်းအဆုံးမခံဘဲ ကိုယ့်အဆင့်ကိုယ်သိ၊ ကိုယ့် သမိုင်းကိုယ်ရေးပြီး R ကြီးလို ပြုံးရယ်နေလိုက်
တာက ရင့်ကျက်ခြင်းလို့ ခေါ်ထိုက်ပါတယ်။ တချို့အမှန်တရားတွေက ငြိမ်သက်နေလိုက်ရင် ပိုလှပပါတယ်။ (မူရင်းရေးသားသူအား လေးစားမှုဖြင့် – bkr)
